ئەو هاوڵاتییەی سەدام حسێنی لەناو چاڵێكدا شاردەوە، ئێستا خاوەن چێشتخانەیەو چەند نهێنییەكی ئەو چاڵەش ئاشكرا دەكات.
عەلا نامیق كەهاوڵاتییەكی تەمەن (41) ساڵ پێشتر لەسەردەمی بەعسدا لەكۆشكی سەرۆكایەتی شۆفێر بووە، دوای رووخانی رژێمی بەعس لەساڵی (2003) لەناو كێڵگەیەكی خۆیدا چاڵێكی گەورەی بۆ سەدام حسێن درووستكرد كەتا ئەو رۆژەی دەستگیركرا لەو چاڵەدا مایەوە.
عەلا ئاماژە بەوە دەكات، پێش ئەوەی چاڵەكە بۆ سەدام درووست بكەن، لەچەندین ناوچەدا هاوكاری هاتووچۆی سەدامیان كردووەو دواتر داوای لێكردوون هاوكاری بكەن‌و ئەوانیش داواكەیان قبوڵ كردووەو ئەو چاڵەیان بۆ درووستكردووەو تارۆژی دەستگیركردنیشی لەوێ خۆی حەشارداوە، كەرۆژانە بەهیچ شێوەیەك تەلەفۆنی بەكارنەهێناوە، چونكە دڵنیابووە كەئەمریكییەكان گوێ لەپەیوەندییە تەلەفونییەكان دەگرن، بەڵام رۆژانە بەزۆری شیعرو پەخشانی دەخوێندەوە.
عەلا وتیشی: تەنها عودەی‌‌و قوسەی توانیویانە سەردانی سەدام بكەن‌و ئەركی ئەو هاتووچۆ‌و سەردانە نهێنیانەش لەئەستۆی خۆی‌‌و برایەكی بووە بەناوی (قەیس)، هاوكات سەدام بەچەندین شێوە وتاری زۆر توندی لەناو چاڵكەدا بۆ لایەنگرانی تۆمار دەكرد بۆ ئەوەی شەڕ لەدژی ئەمریكا بكەن، بەڵام هەستی بەوە كردبوو كەجارێكی تر نابێتەوە بەسەرۆك كۆمارو رۆژێكیش دێت دەستگیر دەكرێت‌و لەسێدارەش دەدرێت.
